SuperSportSchools Cricket

Klofies weer kampioene van die Finsbury-reeks

By Hannes Nienaber , in cricket Cricket | News News , at 27 February 2022

Die Hoërskool Waterkloof se eerstespan is steeds die kampioen van die Finsbury-liga

Die Klofies het Saterdag op sy tuisveld vir die Hoërskool Menlopark in die eindstryd van die reeks met 113 lopies verslaan. Die tuisspan het die loot gewen en besluit om eerste te kolf. 

Waterkloof het toe 295/7 in sy toegelate 50 boulbeurte aangeteken. Twee vyftigtalle deur Marcus Bakker (74) en Stefan Driemeyer (73) het die fondasie vir die reuse-telling gelê.

Waardevolle bydraes met die kolf deur Christiaan Janse van Vuuren (49) en Christiaan du Toit (48) het ook belangrike rolle in die sege vertolk. Die Parkies se Corné Burger (2/57) en Steve Stolk (2/72) was hul beste boulers. 

Menlopark is daarna tot 182 lopies in 37.4 boulbeurte beperk. Sy aanvangskolwer Duan St Arnaud (83) het met sy vyftigtal moedig geveg. Stolk het ook ‘n waardevolle 30 lopies tot sy span se beurt bygedra.  

Bakker (2/0), Tristan Luus (2/20) en Wian Ruthven (2/32) het elk van twee Menlopark kolwers ontslae geraak. Buiten die twee spanne in die eindstryd het Centurion, Nelspruit, Rustenburg en Potchefstroom Volkskool ook aan die boonste afdeling van die Finsbury-reeks deelgeneem. 

Beknopte telkaart: 

Waterkloof 295/7 (Marcus Bakker 74, Stefan Driemeyer 73, Christiaan Janse van Vuuren 49, Christiaan du Toit 48; Corné Burger 2/57, Steve Stolk 2/72); Menlopark 182 (Duan St Arnaud 83, Steve Stolk 30; Marcus Bakker 2/0, Tristan Luus 2/20, Wian Ruthven 2/32). Waterkloof wen met 113 lopies

Comments


Leave a Reply